2025年12月更新。
計劃往往追唔上實際情況。
一開始訂落嚟嘅計劃其實相當保守：每個月供 5,000 港元。但去到實際操作，依家實質供緊 1,200 美元，大約 10,000 港元。而家月供亦冇再用咁複雜嘅估值模型去睇，基本原則就係——供就一直供，如果遇到明顯回調，先至一筆過入市。
核心持股與犯錯經驗
原先打算月供嗰啲會係核心持股，唔會輕易退場。但實際上，遇到輕微下跌，又因為覺得估值偏貴而選擇沽貨。結果當然好快就知道自己錯，之後又要用更高嘅價錢入返市。
不過，投資本身就係一個學習過程，必須靠經驗，喺不停犯錯之中慢慢領悟。因為有好多教條式嘅理論，你聽完之後，實際操作時面對情緒同心理壓力，未必可以好清晰咁記得自己應該點做。
「動態月供」的實際困難
例如我今年年初曾經訂立一個月供計劃，每月供 5,000，分別供 VIG、SCHD、VOO，同時亦會因應估值作出調整：
當 SCHD 的 CAP 小於 20，就加碼供款
高於某個水平，就減少供款
但呢種看似好「Dynamic」嘅月供策略，其實操作上非常複雜，實際執行係好困難。
到最後，反而變成一個更簡單嘅方式：
有錢就供，盈餘多就供多啲。
原定係每月供 5,000，到中後期實際供到 1,200 美元（約港幣一萬）。而且期間每逢覺得市場偏便宜，都會額外入貨。
計劃以外，更重要的是投資哲學
所以呢個過程對我嚟講係一個提醒：
計劃歸計劃，最重要始終係清晰嘅投資邏輯，或者投資哲學。
喺組合管理上，我哋要清楚知道 何時供、何時守，以及點樣做資產配置。
以我而家嘅配置為例：
大部分係 股票
約 16% 為債券
現金約 50–60 萬
佔整個 Portfolio 約 三至四成
以整體比例嚟講，流動資金係相當充足。
風險預期與心理準備
正因為有足夠現金，我預計如果接下來出現跌勢，我係有時間同空間慢慢入市。
我亦不斷提醒自己要有心理準備。例如而家持倉假設係 100 萬，我要預計有機會下跌 三至四成，即係可能變成 60 萬。重點唔係數字本身，而係——
呢種波動會唔會影響我嘅生活？
最重要係事前安排好流動資金，避免因為股市下跌而被迫沽貨。因為喺投資入面，最差嘅情況就係被迫離場。
資產選擇與調整方向
當我有能力坐到底，前提一定係要揀啱標的。例如：
以 指數型資產 為主
避免永久性損失
股市有機會出現大幅調整，但指數出現永久損失嘅機會相對好低，只係可能需要較長時間去消化。
現階段，我仍然認為 美國市場嘅增長最強；而 港股估值相對便宜，未來會考慮加多啲港股作為配置。
總結
回頭再睇，之前訂落嚟嘅投資計劃，實際執行上同原本構想已經 完全唔同。
我有冇做錯？
其實冇。
投資本身就係一個高度動態嘅過程，需要不斷學習、不停修正，用經驗去調整策略。同時要清楚記得自己做過啲乜嘢係對、乜嘢係錯——
做錯嘅，就要即刻修正，盡量減低損失。
沒有留言:
張貼留言